Shlyerja e Fajit (8)
Vuajtja e Krishtit (pjesa 2)
Mbartësi i mëkatit
“Sepse ai bëri të jetë mëkat për ne ai që nuk njihte mëkat, që ne të bëhemi drejtësia e Perëndisë në të.”.
(2 Korintasve 5:21)
Parathënie
Dhimbja fizike që duroi Krishti, është vështirë për t’u imagjinuar. Filmat e ndryshëm, si p.sh. ‘Pasioni i Krishtit’, e përqëndrojnë vëmendjen e tyre gabimisht tek kjo pjesë e jetës së Tij, dhe për këtë arsye, ata nuk e paraqesin drejt qëllimin pse Krishti erdhi në botë. Por ky problem zmadhohet edhe më shumë për faktin se ka shumë pak njerëz, madje edhe nga ata brenda kishës, që nuk e kuptojnë dhimbjen psikologjike që provoi Zoti, kur mbarti mbi supet e Tij mëkatin dhe fajin tonë. Po të përqëndrohemi vetëm tek një aspekt i vuajtjes së Zotit, (d.m.th. tek aspekti fizik), atëherë nuk do ta kuptojmë siç duhet sakrificën e Tij.
Përsosshmërisht i shenjtë
Si besimtarë, ne ndiejmë turp dhe keqardhje, kur nuk i bindemi Zotit. E kuptojmë se mëkati ynë ka shkaktuar një ndarje të shoqërisë sonë me Perëndinë (Isaia 59:2). Si pasojë, kjo na bën të ndihemi fajtorë dhe të ndëshkuar. Sa më shumë që të dëshirojmë të jetojmë një jetë të shenjtëruar, aq më i madh do të jetë shqetësimi që ndjejmë kur mëkatojmë kundër Perëndisë.
Si do të ishte ndjerë Jezusi, pra, kur mori mbi Vete “mëkatin e botës” (Gjoni 1:29)? Ai ishte absolutisht i shenjtë në çdo drejtim. Ngaqë ishte Perëndi, Ai do ta kishte urryer tmerrësisht mëkatin. Ai ishte i shenjtë, ndaj mëkati ishte diçka e panjohur për Të (1 Pjetrit 2:24; 2 Korintasve 5:21; Hebrenjve 7:26). E megjithatë, për shkak se Ai e deshi Atin Perëndi dhe mëkatarët, Ai vullnetarisht mbarti mbi supe tërë peshën e mëkatit tonë. Është e pamundur në këtë botë që ne ta kuptojmë plotësisht dhimbjen e brendshme që ndjeu Jezusi, kur Ai u bë mbartësi i mëkatit.
U bë të jetë mëkat
Të gjithë i dinë fjalët e mrekullueshme të regjistruara tek Isaia 53:6, 12, që thonë: “Zoti bëri që të bjerë mbi të paudhësia e ne të gjithëve… ai ka mbajtur mëkatin e shumë vetave”. Gjon Pagëzori, pa dyshim, iu referua Isaias 53, kur deklaroi se Jezusi ishte “Qengji i Perëndisë, që heq mëkatin e botës” (Gjoni 1:29). Apostulli Pal gjithashtu na mëson se Jezusi u bë “të jetë mëkat për ne” (2 Korintasve 5:21). Ky portretizim i Mesisë si mbartës i mëkatit, do të zgjasë në përjetësi (Zbulesa 5:12).
U bë mallkim për ne
Tek Galatasve 3:13, Pali përdor një shprehje shumë të fuqishme, kur thotë se Krishti “u bë mallkim për ne”. Ai i referohet Ligjit të Përtërirë 21:22-23, ku bëhet fjalë për kriminelin që “ka kryer një krim që meriton vdekjen” dhe egzekutimi i tij (varja në pemë) vërtetonte se ai ishte “i mallkuar nga Perëndia”. Nuk është çudi, pra, që Isaia e përshkruan Krishtin si “të rrahur nga Perëndia”, kur “Zoti bëri që të bjerë mbi të paudhësia e ne të gjithëve” (Isaia 53:5, 6). Biri i shenjtë dhe i vetëmlindur i Perëndisë mbarti mallkimin mbi Vete!
Ai mori fajin tonë
Faji ynë iu ngarkua Krishtit në të njëjtën mënyrë ashtu siç mëkati i Adamit na u ngarkua neve. Ati Perëndi e konsideroi Jezusin fajtor, ngaqë Ai, si mbartës i mëkatit, mori mbi Vete çdo aspekt të mëkatit të njeriut. Kjo nuk do të thotë se natyra e Jezusit u bë mëkatare, por se faji ynë iu transferua Atij në mënyrë vullnetare. Kështu Ai u bë i vetmi person, i denjë për ta pranuar tërë forcën e zemërimit të Perëndisë (Romakëve 8:1).
Përfundim
Shpëtimtari ynë e plotësoi çdo kërkesë të ligjit, duke kënaqur kështu drejtësinë e Perëndisë. Çmimi për shlyerjen e fajit tonë nuk mund të paguhet nëpërmjet veprave të mira, apo veprimeve fetare, apo ndershmërisë së njeriut. Perëndia pret që ne thjesht t’i besojmë Atij që pagoi çmimin, që u bë zëvendësi ynë dhe që bëri të mundur që ne të hyjmë “në shenjtore”, në vendin e shenjtë (Hebrenjve 10:14-20).
per autorin:
Që prej 25 vjetësh, Gary J. Hall ka qenë pastor i kishës biblike “Fjala e Gjallë” në Liverpul të Mbretërisë së Bashkuar të Britanisë së Madhe. Ai u rrit si katolik, por në vitin 1973, në moshën 17-vjeçare, u bë besimtar i krishterë, duke e pranuar Krishtin si Zotin dhe Shpëtimtarin e Tij. Ai është diplomuar prej Bashkësisë së Shërbesave Ungjillizuese si shërbëtor i Fjalës së Perëndisë dhe tani është drejtor i Akademisë së kësaj bashkësie. Pastor Gary ka bërë vizita të shpeshta në Shqipëri, që prej 1993-shit. Ai i është mirënjohës Perëndisë për mundësitë e mrekullueshme që i ka dhënë, për të ndarë Fjalën e Tij me shqiptarët. Kisha biblike “Fjala e Gjallë” ka faqen e saj të internetit, e cila përmban studime dhe artikuj të ndryshëm në shqip. Vizitojeni tek www.LWBC.co.uk ose mund të shkoni direkt tek faqja në shqip, duke përdorur këtë adresë http://fjalaegjalle.2truth.com Magdalena (Magda) Maylam (mbiemri i vajzërisë “Gjoni”) është shqiptare me banim që prej 8 vjetësh në Liverpul të Anglisë. Lindur e rritur me frymën ateiste në Laç, afër Krujës, Magda, me inisiativën e prindërve të saj, filloi të mësojë anglisht që në moshën 7-vjeçare. Kur Shqipëria ia hapi dyert Ungjjillit të Jezus Krishtit, Magda e gjeti veten si përkthyese të misionarëve të ndryshëm, që vinin në qytetin e saj. Dalë nga dalë, Fjala e Perëndisë i depërtoi në zemër, duke e bindur për mëkatin dhe duke i dhënë jetës së saj kuptim e qëllim. Magda e pranoi Krishtin si Zotin dhe Shpëtimtarin e saj personal në moshën 15-vjeçare. Gjatë një vizite 8-mujore studentore në Denver, Kolorado të Shteteve të Bashkuara të Amerikës, Magda u pagëzua dhe e deklaroi hapur besimin e saj të ri në vitin 1995. Magda ka mbaruar fakultetin e Shkencave Shoqërore dhe Politike, duke studiuar si në Stamboll të Turqisë, ashtu edhe në Liverpul të Anglisë. Për momentin, ajo po studion për Diplomën në Teologji me Akademinë Ungjillore të Bashkësisë së Shërbesave Ungjillizuese në Angli. Magda është e martuar me Tarkuinin, besimtar anglez dhe trajner tenisi. Të dy janë anëtarë të kishës biblike “Fjala e Gjallë” në Liverpul. Ata kanë dy djem, Boaz dhe Kejleb, që përpiqen t’i rritin për Perëndinë dhe lavdinë e Tij. Ata i mirëpresin lajmet tuaja në adresën j4ver.magtar@virgin.net
