Koha e Shenjtërimit (Pjesa 3)
Bindja
“O vëllezër, po ju bëj thirrje, nëpërmjet dhembshurisë së Perëndisë, ta paraqisni trupin tuaj si fli të gjallë, të shenjtëruar, të pëlqyer te Perëndia, që është shërbesa juaj e mënçur. Dhe mos u konformoni me këtë botë, por transformohuni me anë të ripërtëritjes së mendjes suaj, që të provoni cili është i miri, i pëlqyeri dhe i përsosuri vullnet i Perëndisë” (Romakëve 12:1-2).
Parathënie
Besimi efikas (që jep fryte) duhet të përfshijë bindjen se urdhërimet e Perëndisë janë të arsyeshme (të mënçura). Me fjalën ‘bindje’ ne nënkuptojmë jo vetëm të rënit dakort me faktin se jemi të privuar nga lavdia e Perëndisë, por gjithashtu edhe me domosdoshmërinë për dedikim (përkushtim). Një pjesë e rëndësishme e shenjtërimit është t’i japësh gjithçka Zotit.
Përkushtim me gjithë zemër
Perëndia kërkon nga ne një përkushtim me gjithë zemër ndaj Tij, një dashuri të vërtetë dhe besnike për Të. A e besojmë se kjo që kërkon Ai prej nesh është e drejtë, e arsyeshme, dhe gjëja më e mirë për ne? Këtë pikërisht thotë Pali tek Romakëve 12.
Të bësh vullnetin e Perëndisë duhet të jetë gjëja më e ëmbël dhe më e sigurtë mbi këtë tokë. Gjithçka tjetër përveç kësaj është rezultat i mëkatit, mosbesimit dhe mosbindjes.
Zoti Jezus Krisht tha: “Sepse kushdo që kryen vullnetin e Atit tim që është në qiej, më është vëlla, motër dhe nënë” (Mateu 12:50). A e dëgjojmë se ç’po na thotë Ai? Të bindurit ndaj vullnetit të Perëndisë është një shenjë e sigurtë se besimtari ka një marrëdhënie të gjallë me Krishtin. Prandaj, të kryerit e vullnetit të Perëndisë duhet të jetë me të vërtetë një gjë e mirë, e përsosur dhe e kënaqshme.
Shenjtërimi e bën të mundur përkushtimin
Nuk duhet të ngatërrohemi në këtë pikë. Përkushtimi (dedikimi) nuk është kusht i të marrit të Frymës së Shenjtë, sepse, po të ishte kështu, atëherë Fryma e Shenjtë do merrej përmes veprave dhe jo përmes besimit. Përkushtimi është produkt i marrjes së bekimit dhe jo shkaku i kësaj marrjeje.
Askush nga ne nuk mund t’ia dorëzojë gjithçka Perëndisë pa praninë ngushëlluese të Frymës së Perëndisë. Kur Ai vjen në jetën tonë, atëherë dhe vetëm atëherë, jemi në gjendje t’ia ofrojmë Perëndisë trupat tanë si flijim i gjallë. Nëse marrja e bekimit nuk na drejton për të bërë këtë gjë, atëherë nuk po ndjekim udhëheqjen e Frymës së Shenjtë. S’ka dyshim që një nga rolet e shërbesës së Frymës është të na bëjë ne të shenjtë!
Bindja për mëkatin
Zoti duhet të na bindë për mëkatin, për faktin se kemi një zemër të vakët ndaj Tij, për hipokrizinë. Para se ne të përpiqemi t’ia përkushtojmë gjithçka Atij, Ai duhet të na zbulojë mungesën e arsyes së të jetuarit për veten tonë në çfarëdolloj pjese të jetës sonë.
Kjo bindje sjell si rezultat një uri dhe etje për drejtësi. Kjo bindje është të kuptuarit plot dhimbje se brenda nesh ka shumë gjëra, që nuk i japin lavdi emrit të Tij.
Përfundim
A biem dakort se Perëndia është një Perëndi i shenjtë? A nuk është, pra, e arsyeshme për Të, që të na urdhërojë të jetojmë një jetë plotësisht të dedikuar ndaj Tij? Në vend, pra, që të shfaqësohemi për mëkatin tonë, le të pushojmë së dëgjuari pëshpëritjet e mosbesimit dhe ta hedhim fatin tonë me Perëndinë. Le ta shikojmë këtë çështje me hollësi, dhe njëherë e përgjithmonë të ecim “denjësisht sipas thirrjes” për të cilën u thirrëm (Efesianëve 4:1). Apostulli Pjetër shkruan: “Por ashtu si është i shenjtë ai që ju thirri, të jini edhe ju të shenjtë në gjithë sjelljen tuaj, sepse është shkruar: “Jini të shenjtë, sepse unë jam i shenjtë“” (1Pjetrit 1:15-16; shiko gjithashtu Levitiku 20:7 dhe Levitiku 11:44).
per autorin:
Që prej 25 vjetësh, Gary J. Hall ka qenë pastor i kishës biblike “Fjala e Gjallë” në Liverpul të Mbretërisë së Bashkuar të Britanisë së Madhe. Ai u rrit si katolik, por në vitin 1973, në moshën 17-vjeçare, u bë besimtar i krishterë, duke e pranuar Krishtin si Zotin dhe Shpëtimtarin e Tij. Ai është diplomuar prej Bashkësisë së Shërbesave Ungjillizuese si shërbëtor i Fjalës së Perëndisë dhe tani është drejtor i Akademisë së kësaj bashkësie. Pastor Gary ka bërë vizita të shpeshta në Shqipëri, që prej 1993-shit. Ai i është mirënjohës Perëndisë për mundësitë e mrekullueshme që i ka dhënë, për të ndarë Fjalën e Tij me shqiptarët. Kisha biblike “Fjala e Gjallë” ka faqen e saj të internetit, e cila përmban studime dhe artikuj të ndryshëm në shqip. Vizitojeni tek www.LWBC.co.uk ose mund të shkoni direkt tek faqja në shqip, duke përdorur këtë adresë http://fjalaegjalle.2truth.com Magdalena (Magda) Maylam (mbiemri i vajzërisë “Gjoni”) është shqiptare me banim që prej 8 vjetësh në Liverpul të Anglisë. Lindur e rritur me frymën ateiste në Laç, afër Krujës, Magda, me inisiativën e prindërve të saj, filloi të mësojë anglisht që në moshën 7-vjeçare. Kur Shqipëria ia hapi dyert Ungjjillit të Jezus Krishtit, Magda e gjeti veten si përkthyese të misionarëve të ndryshëm, që vinin në qytetin e saj. Dalë nga dalë, Fjala e Perëndisë i depërtoi në zemër, duke e bindur për mëkatin dhe duke i dhënë jetës së saj kuptim e qëllim. Magda e pranoi Krishtin si Zotin dhe Shpëtimtarin e saj personal në moshën 15-vjeçare. Gjatë një vizite 8-mujore studentore në Denver, Kolorado të Shteteve të Bashkuara të Amerikës, Magda u pagëzua dhe e deklaroi hapur besimin e saj të ri në vitin 1995. Magda ka mbaruar fakultetin e Shkencave Shoqërore dhe Politike, duke studiuar si në Stamboll të Turqisë, ashtu edhe në Liverpul të Anglisë. Për momentin, ajo po studion për Diplomën në Teologji me Akademinë Ungjillore të Bashkësisë së Shërbesave Ungjillizuese në Angli. Magda është e martuar me Tarkuinin, besimtar anglez dhe trajner tenisi. Të dy janë anëtarë të kishës biblike “Fjala e Gjallë” në Liverpul. Ata kanë dy djem, Boaz dhe Kejleb, që përpiqen t’i rritin për Perëndinë dhe lavdinë e Tij. Ata i mirëpresin lajmet tuaja në adresën j4ver.magtar@virgin.net
