Koha e Shenjtërimit (Pjesa 2)
Dëshirë e flaktë
“Lum ata që janë të uritur dhe të etur për drejtësi, sepse ata do të ngopen”
(Mateu 5:6)
“Prandaj po ju them: Të gjitha ato që ju kërkoni duke lutur, besoni se do t`i merrni dhe ju do t`i merrni”
(Marku 11:24).
Parathënie
Ai i krishterë që i jep vendin e parë Perëndisë në jetën e tij, ka një dëshirë të madhe për të patur një shpëtim të plotë. Ai dëshiron me gjithë zemër që të ketë lirinë dhe gëzimin e Krishtit, dhe këto gjenden tek ata që i kanë vënë si synim vetes një jetë të shenjtëruar.
Dëshiro dhe kërko
Tek Luka 11, Zoti Jezus Krisht flet për dhuratën e bekuar të Frymës së Shenjtë, por para se ta japë këtë premtim, Ai tregon shëmbëlltyrën e një djali të uritur. “Dhe cili nga ju është baba i tillë që, po t`i kërkojë bukë djali, i jep një gur? Ose po t`i kërkojë një peshk, në vend të peshkut i jep një gjarpër? Ose, po t`i kërkojë një vezë, i jep një akrep?” (Luka 11:11-12).
Djali nuk kërkoi gjëra të shtrenjta, por thjesht bukë, një domosdoshmëri e jetës. Shumë njerëz merakosen për gjërat që janë më të parëndësishmet në këtë botë: lluksi, kënaqësia dhe pasuria. Si besimtarë, ne dëshirojmë atë që është më e rëndësishmja, d.m.th. të ecim siç eci Krishti në këtë botë. “Sepse për këtë ju u thirrët, sepse edhe Krishti e vuajti për ne, duke ju lënë një shembull, që të ecni pas gjurmës së tij” (1 Pjetrit 2:21)… “Ai që thotë se qëndron në të, duhet të ecë edhe vetë sikurse ka ecur ai” (1 Gjonit 2:6).
A jemi aq shumë të uritur?
Dëshira më themelore e të gjitha gjallesave është ushqimi (të ushqyerit). A kemi uri dhe etje për drejtësinë e Perëndisë? (Mateu 5:6). Nëse po, atëherë s’ka dyshim se do të ngopemi.
A shkrihet shpirti ynë për një jetë të mbushur me praninë e Perëndisë, me jetë, gëzim dhe paqe? A mund të thërrasim së bashku me Davidin: “Shpirti im dëshiron me zjarr dhe shkrihet për oborret e Zotit; zemra ime dhe mishi im i dërgojnë britma gëzimi Perëndisë të gjallë” (Psalmi 84:2)?
A e kërkojmë dhe e dëshirojmë shpëtimin e plotë dhe të gëzueshëm në Krishtin? Nëse jo, duhet ta kërkojmë patjetër!
Përfundim
Kishat tona janë të mbushura plot me anëtarë, që kritikojnë, janë zemër-gurë, nuk falin, por mbajnë mëri. Ngado që hedhim sytë, shohim mëkat, paperëndishmëri dhe të ndjekurit pas botës; askush nuk shqetësohet për këtë gjë. S’ka dyshim që duhet të kthehemi tek “dashuria [jonë] e parë” dhe duhet të “bëjmë veprat e para” (Zbulesa 2:4-5). Duhet të kemi një dëshirë për të qenë të shenjtë, dhe jo të kënaqim vetveten dhe të largohemi nga rruga e Perëndisë.
E gjitha kjo varet nga sa të thellë (të flaktë) e kemi dëshirën tonë për Zotin.
per autorin:
Që prej 25 vjetësh, Gary J. Hall ka qenë pastor i kishës biblike “Fjala e Gjallë” në Liverpul të Mbretërisë së Bashkuar të Britanisë së Madhe. Ai u rrit si katolik, por në vitin 1973, në moshën 17-vjeçare, u bë besimtar i krishterë, duke e pranuar Krishtin si Zotin dhe Shpëtimtarin e Tij. Ai është diplomuar prej Bashkësisë së Shërbesave Ungjillizuese si shërbëtor i Fjalës së Perëndisë dhe tani është drejtor i Akademisë së kësaj bashkësie. Pastor Gary ka bërë vizita të shpeshta në Shqipëri, që prej 1993-shit. Ai i është mirënjohës Perëndisë për mundësitë e mrekullueshme që i ka dhënë, për të ndarë Fjalën e Tij me shqiptarët. Kisha biblike “Fjala e Gjallë” ka faqen e saj të internetit, e cila përmban studime dhe artikuj të ndryshëm në shqip. Vizitojeni tek www.LWBC.co.uk ose mund të shkoni direkt tek faqja në shqip, duke përdorur këtë adresë http://fjalaegjalle.2truth.com Magdalena (Magda) Maylam (mbiemri i vajzërisë “Gjoni”) është shqiptare me banim që prej 8 vjetësh në Liverpul të Anglisë. Lindur e rritur me frymën ateiste në Laç, afër Krujës, Magda, me inisiativën e prindërve të saj, filloi të mësojë anglisht që në moshën 7-vjeçare. Kur Shqipëria ia hapi dyert Ungjjillit të Jezus Krishtit, Magda e gjeti veten si përkthyese të misionarëve të ndryshëm, që vinin në qytetin e saj. Dalë nga dalë, Fjala e Perëndisë i depërtoi në zemër, duke e bindur për mëkatin dhe duke i dhënë jetës së saj kuptim e qëllim. Magda e pranoi Krishtin si Zotin dhe Shpëtimtarin e saj personal në moshën 15-vjeçare. Gjatë një vizite 8-mujore studentore në Denver, Kolorado të Shteteve të Bashkuara të Amerikës, Magda u pagëzua dhe e deklaroi hapur besimin e saj të ri në vitin 1995. Magda ka mbaruar fakultetin e Shkencave Shoqërore dhe Politike, duke studiuar si në Stamboll të Turqisë, ashtu edhe në Liverpul të Anglisë. Për momentin, ajo po studion për Diplomën në Teologji me Akademinë Ungjillore të Bashkësisë së Shërbesave Ungjillizuese në Angli. Magda është e martuar me Tarkuinin, besimtar anglez dhe trajner tenisi. Të dy janë anëtarë të kishës biblike “Fjala e Gjallë” në Liverpul. Ata kanë dy djem, Boaz dhe Kejleb, që përpiqen t’i rritin për Perëndinë dhe lavdinë e Tij. Ata i mirëpresin lajmet tuaja në adresën j4ver.magtar@virgin.net
